الثلاثاء، 1 أبريل 2008

عمرك حسيت فجأة أنك بتحب بلدك اوى


عمرك حسيت فجأة أنك بتحب بلدك اوى ؟؟..
بجد والله .. المرة دى مش أحلام ولا أوهام وهافوق منها وأصدمكم معايا بالواقع الأليم ..
لكن لأنى شوفت قد ايه اللى بيتغرب عن البلد دى بيرجع ليها وهو مشتاق لترابها .. كل اللى اتغرب عنها بيملك أسلحه قويه للدفاع عنها .. ومهما غاب بيشتاق ليها ولأرضها حتى لو مالوش أهل فيها ..
قولت يبقى جايز لأنى فيها دايما محستش بكده ... يمكن عمرى ما حسيت بحجم غلاوتها جوايا لأنى عمرى ما أتغربت عنها ..
لكن النهاردة احساس الحنين خدنى ليها .. حنيت ليها وانا جواها .. يمكن لأنى فكرت بطريقه تانيه .. فكرت فى مواطن جمالها .. مش فى حكومتها .. فكرت فى شعبها وطيبته .. مش فى ضعفه وحاجته ..
سألت نفسى لو بإيدى اختار غيرها .. هاختار اى وطن ؟؟
بس لقيت ان السؤال مينفعش .. لأن شرى الوطن صعب اوى .. مينفعش ابدلها .. ولا ينفع حتى اقسو عليها بتفكيرى ..
لأن الذنب مش ذنبها .. الذنب ذنب اللى ضيعها .. وضيع خيرها عن اهلها .
يمكن كلامى أختلف تماما عن اللى كنت كتبته قبل كده .. من نقمه على البلد .. وكره فى حكمها .. وضيقه من ضعف شعبها ..
لكن النهاردة كل ده أختلف ..لأنى اكتشفت أنى بحب البلد دى بجد ..
مهما شفنا منها قسوة .. فالقسوة مش منها .. القسوة من اللى مسكوها وحكموها من نار بأسم الديموقراطيه .. وهى ديكتاتوريه مقنعه بالحريه ..
فكرت فى شهامة شبابها .. قبل ما أفكر فى اللى بيسرقها ..
فكرت فى خيرأرضها .. قبل ما احسب ايه اللى بيوصلنا منه ..
وأتعلمت حاجه مهمه اوى من تفكيرى ده ...
إننا لو عايزين نشوف مساوىء حاجه .. مش هنشوف غير المساوىء و بس فيها .
لكن لو دورنا على الجمال فى بلدنا .. هنلاقيه حوالينا فى أهلها وفى أرضها ..وفينا .
عزيـزة وغـاليـه بقلبـى يـا بلـدى .

هناك 11 تعليقًا:

د/اجدع بنوته يقول...

تحيا مصررررررر ياعم

انا بقى اللى انتى وصفتيه ده

عندى كل يوم كل لحظه

بحب مصر بغباااااااااااء

بجد فداها روحى يعنى

ياخراشى ع ده انتماء ياجدعان

ضــى القمــر يقول...

أجدع بنوته

والله احيانا بتلاقى الواحد يجيه احساس تانى .. يكره وقتها كل حاجه .. بس فعلا البلد مالها ذنب .. الذنب ذنب اللى ضيعها . منهم لله

بس مهما كانت ارضنا .. بلدنا .. وما نقدر نسمع عليها كلمه .

كلماتك وردك لهما وقع خاص لدى .. فلا ترحمينى من روعه حضورك ..

تقديرى لكى اختى

هاني النجار يقول...

العزيزة ضي القمر

عمنا صلاح جاهين قال اللي كل مصري عاوز يقوله

بحبها وهى مالكه الارض شرق وغرب
واحبها وهى مرميه جريحة حرب
بحبها بعنف ,وبرقه ، وعلي استحياء
واكرها والعن ابوها بعشق زي الداء
واسيبها واطفش في درب ,وتبقي هى في درب
وتلتفت تلقيني جنبها في الكرب

لكن الغريب والعجيب
انكِ لو سألت أي حد .. بتحبها ليه ؟؟
هايقولك مش عارف .. لكن بأحبها .. وأعشق تراب أرضها ..
طيب ليه ؟؟ .. برضه مش عارف

سبحان الله

Unknown يقول...

بجد انا شكلى هعيط الاول دخلت على مدونة أفتح قلبك الممتعة ودلوقتى أخش ألاقى مشاعر جميلة
لا بقى انا هعيط
بجد بحبها دى بلدى ودول أهلها

هاني النجار يقول...

مازلت في انتظار حروف أخرى يا ضي

فلا أطال الله لكِ غيبة

ضــى القمــر يقول...

أخى المهاجر

كلمات جاهين كانت خير وصف .. فكثيرا ما نغضب ونثور ممال نراه .. لكن حين نضع انفسنا فى اختبار التنازل أو أن نبدلها .. فنجد مشاعرنا هو المتحكمه وقتها ..

أشكرك على اقتباس كلمات الرائع جاهين .

شكرا لتواجدك يا اخى .

ضــى القمــر يقول...

sasatifa

لا من غير عياط ولا حاجه .. نورت المدونه يا اخى

شكرا لك ولتشريفك .. وتعليقك الجميل .

ضــى القمــر يقول...

أخى المهاجر .

أشكر ردك للمرة الثانيه ..

لكن حروفى غائبه قليلا .. حتى اعود لنفسى أولا .

شكرا لك مرة آخرى على السؤال يا اخى .

ضــى القمــر يقول...

احمد شوقى .

أشكرك على هذه الدعوة يا الهامه .

أعننا الله واياكم على فعل الخير .

شكرا لتشريفك المدونه .

هاني النجار يقول...

يبدوا أن المسافات بين الحروف المتناثرة
قد تزايدة

لا أطال الله لكِ غيبة .. ولا فرَّق بين حروفكِ
فرغم أنها متناثرة ( إلا أنها عميقة )

ضــى القمــر يقول...

اخى المهاجر

صدقت يا اخى .. بالبعد بين الحروف ربما كان كثيرا .. ولكن بعد الحروف أهون كثيرا من البعد عن انفسنا .

تقديرى لسؤالك يا اخى .

لا حرمت تشريفك للمدونه .