الأحد، 11 مايو 2008

نظــرة على زمنـــا


من كام يوم دخلت مدونه الطائر الحزين وهناك قريت موضعه عن حلاوة زمان ..

سرحت فى الزمن اللى فات وفى القصص اللى كنت بسمعها عن الجيل اللى فات .. وشوفت إن كل جيل بيمجد فى زمنه إزاى .. وكأن الدنيا وقفت عند الزمن القديم ... فقولت يبقى اكيد هيجى عليا يوم أحكى فيه لأحفادى عن زمنى الجميل ... اللى هو ده طبعا ..

المهم فى لحظه عدت السنين جرى من قدام عينى .. وشوفت نفسى ست كبيرة .. بيتاخد كلامها على انه حكم .. وبتتسمع منها القصص على انها عبر.. وكأنهاعاشت فى زمن كان كله جميل .. عمرها ما عاشت يوم حزين .. ولا عمرها حلمت بحاجه مستحيله التحقيق .

المهم قولت فى نفسى طيب أكمل التخيل وأنا خسرانه أيه .. خلينى أشوف ممكن أقول لأحفادى ايه عن زمنى الجميل ..

أحم ..... أحم

طبعا هبدأ كلامى معاهم بالكلمه الأساسيه اللى هى .. زمان يا ولاد كان فى خير كثيير مش زى ايامكم دى ... ( يعنى المفروض أن زمنا ده هيكون كان زمن خير بعد 40 سنه مثلا )

زمان كان البلد فاضيه ( على اساس أننا 80 مليون بس ) ونظيفه جداااا ..... مش زى الأيام دى الدنيا بقت خنقه وزحمه لا تطاق ..

زمان كان الواحد بياخد مصروف 10 جنيه بيجيب بها كذا حاجه ..... مش دلوقتى اللى أتلغت فى ال10 جنيه أساسا ..

زمان كانوا الشباب كلهم رجاله .. اللبس لبس رجاله .. الشهامه شهامه رجاله ....... لكن دلوقتى ..........

زمان كانت الناس راضيه ومبسوطه وكل واحد راضى بنصيبه ( محدش عارف دى سلبيه ولا رضى المهم أنهم راضيين )...... لكن دلوقتى محدش عاجبه اى حاجه ..

زمان كانت كل حاجه فيها خير ..... لكن دلوقتى كل حاجه فى ايامكم بقت تيك اوى ..



وبعدين أستكفيت بالتخيل لحد كده ... قبل ما أبدأ احكى كل حاجه بالتفصيل لأحفادى .

طيب مادمنا لما هنكبر هنتكلم بكل حب عن زمننا كده .. يبقى ليه مانعيش أيامنا دى لكن برؤية من زمن اللى جاى .

نعيشه على انه هيكون بعد كده مرجع لأحفادنا عن الخير والكرم والشهامه وكل الحاجات دى ...

هنلاقى أننا بنضحك بجد من قلبنا .. طيب وايه يعنى .. مانضحك من قلبنا هنخسر ايه .. حتى لو الضحك ده هيكون على نفسنا .. عادى وفيها ايه ...

هناك 21 تعليقًا:

dreem يقول...

جميل اللى انتى كتباه على الرغم ان فهمه هيختلف من شخص لاخر يعنى مثلا هتلاقى حد بيفهمه على انه دعوة للتفاءل .. وحد تانى هيقول يعنى النهاردة احلى من بكرة وبكرة كان احلى من النهاردة !!!
تحياتى

ضــى القمــر يقول...

dreem

كل حاجه فى حياتنا بيختلف فهمها من شخص للتانى .. أحتمال يكون اللى كتبته دعوة للتفاؤل .. أو دعوة للخوف على اولادنا من اللى جاى أو يكون دعوة للتشاؤم .. كلا تبع ما يراه ..

شكرا لك تشريفك مدوانتى المتواضعه :)

Tamer Nabil Moussa يقول...

كتبت من شهور عن موضوع تمسك كل جيل بحلاوة الفترة التى وجد فيها وكيفية دفاعة عنها امام الابناء

انها من راى وراثة من الاب الى الابناء

وكل جيل لازم يقول ان الزمن اللى عاش فية كان وكان ولا فى زىة فى اى وقت


رغم ان الطبيعى ان كل وقت فى الحلو وفى الوحش وفى تغيرات كتير

يعنى انا وانتى وغيرنا الان من المدونين نعتبر الى حد ما جيل واحد

هل تستطيعى ان تتركى هذا الزمن وترجعى الى الخلف لااعتقد

ربنا يكرمك

تحياتى

جيفارا المصري يقول...
أزال المؤلف هذا التعليق.
جيفارا المصري يقول...

بالرغم من ان العرب اصحاب مبدء ذم الزمان (وكل العيوب فيهم هما )الا ان كل جيل بيحاول انه يمجدزمنه و عصره علي طريقته
ربما لأننا فعلا بننحدر وكل زمن بييجي بيبقي اسوء من اللي قبله

ضــى القمــر يقول...

تامر نبيل ..

أكيد لا استطيع أن اعود للوراء .. وصدقت يا اخى حين قلت لكل زمن جماله .. لكن الجمال لا نراه دائما إلا فى الكبر .. أو نرى جماله حقا عندما نرى أن نقاط ضعف والمساؤى زادت أكثر عن زمننا .. فوقتها فقط نفقد جمال زمننا ..

تحيتى لك يا اخى ..

وشاكرة لك تشريفك المدونه .

ضــى القمــر يقول...

جيفارا المصرى ..

أوافقك فى اننا حقا بننحدر وكل زمن بييجي بيبقي اسوء من اللي قبله .

مع انه من المفروض أن كل زمن يأتى أفضل مما قبله .. لزيادة التيكنلوجيا وزياده الثقافه .. ولكننا للأسف نزداد دوما فى سلبيتنا وتقبلنا للأمر الواقع بدون اى محاوله جديه منا فى التغير ... فلهذا سيظل كل جيل أسوء مما قبله ..

شكرا لك ولتشريفك مدونتى يا اخى ..

تحيتى لك

هاني النجار يقول...

المشكلة يا ضي اننا مش متأكدين ان الزمن اللي جاي هيكون أسوء من زمنا ، لكن طبيعة الإنسان هى الأمل .. الأمل في غد أفضل من اليوم .. ومادام هناك أمل ان بكره اجمل من النهارده هنفضل عايشين زمانا باعتباره زمان اسود مدهون بدم غراب :)

لكن موضوع رائع بالفعل ، وتفكير منطقي مليون في المية

لك تحياتي

Rania Lelah يقول...

عزيزتى مؤكد ان غدا افضل من اليوم و ان شاء الله يكون زمن ملىء بالتفاؤل

تحياتى لقلمك

ضــى القمــر يقول...

المهاجر

والله الامل موجود وفى نسبه باقيه جوانا من التفاؤل .. بالرغم من اللى بنسمعه ونشوفه كل يوم .. لكن لسه فى امل فى اللى جاى ..

شكرا لك يا اخى على تشريفك المدونه ..

واشكرك على رأيك كثيرا

ضــى القمــر يقول...

رانيا ..

اتمنى ذلك من كل قلبى يا رانيا ..

يارب يارب يكون بكرة احسن بكثيير من النهاردة ..

شكرا لزيارتك غاليتى ..

كل التقدير لشخصك

Unknown يقول...

انا دايما والله بقعد افكر هاقول ايه لاحفادى بس كنت بتمنى احكلهم عن الظلم والطغيان اللى احنا دمرناه بايدينا عشان هما يعيشوا الحياه النضيفه اللى عايشينه دلوقتى(ده سنه2040)

mostafa rayan يقول...

الله عليكي والله العظيم انتي بتقولي كلام حلو قوي بجد عارفة زمنا رغم كل اخفاقاته إلا انه بردة لسة في حاجة حلوة
مافيش حاجة اسمها الزمن الجميل دي كذبةاخترعناها وصدقناها كل زمن له جماله
تحياتي ليكي يا قمر

ضــى القمــر يقول...

sasatifa

لأ هتحكى ليهم عن الظلم والطغيان اللى احنا وافقنا عليه .. وما اعترضنا .. لكن من جوانا كنا خايفين على مستقبل اولادنا .. لكن بنكتفى بأننا نقول أكيد اللى جاى احسن من النهاردة .

شكرا لحضورك وتشريفك لمدنتى يا اخى ..

ضــى القمــر يقول...

mostafarayan

أكيد لكل زمن جماله ... واكيد أن العيب مش عيب زمن .. فما لزمننا عيبا سوانا .. ولكن ياريت نشوف الجمال ده ونقدر نكبره .. قبل ما يكون مجرد ذكريات تتحكى زى الحواديت ..

شكرا لك يا اخى تشريفك الأول لمدونتى ..

تحيتى لك

ايام العمر يقول...

متهيالى انك كتبتى الى انتى كنتى بتحلمى

تقولية لا حفادك بس الحقيقة دة نقش

من كلام جدتنا اليومين دول

اصل الحقيقة الواحد مبيحسش بحلاوة الى هو فية لان الانسان بطبعة طماع عايز اكتر

فلما يشوف الايام الى جاية وهى متنيلة بستين نيلة يقولك ياااة دا انا كنت عايش فى نعمة ويقعد بقى يتحصر ع الى فات

بس بصراحة انا نفسى لما تكبرى ماتقوليش كدة لانة بالطريقة دة يبقى احنا لسة ماشين فى نفس السكة الزفت دة

والى اخرتها متنيلة بستين نيلة

وبالنسبة لامنيتى اتمنى بكرة يكون احلى

دومتى بسعادة

ضــى القمــر يقول...

ايام العمر

كلامى فعلا كان نقش من كلام أجدادنا .. سواء الايام دى او من اجيال أسبق ..

لكن هذا هو الكلام المعتاد ..

وكم ادعى من كل قلبى ألا نقول كلامى هذا لأحفادنا .. وانا نقول لهم زمنكم أفضل ألف مرة ..

شكرا لك يا اخى على تواجدك فى مدونتى

تحيتى لك

هاني النجار يقول...

طال غيابكِ عن مدونتكِ .. لعل المانع خير

KHALED يقول...

جئت أسجل إعجابى بالمدونة المميزة بتاعتك . مواضيع مميزة وأسلوب رشيق
اسمحيلى أتابع من الأن ....

تقبلى تحياتى

ضــى القمــر يقول...

أخى الهاجر

غياب بسيط يا اخى ... وسأعود هنا مرة آخرى إن شاء الله ..

أشكرك يا اخى على سؤالك ..

ضــى القمــر يقول...

أخى خالد

أشكرك على تشريفك مدونتى المتواضعه ..

وأهلا بك دائما يا اخى ..

تحيتى لك