الثلاثاء، 11 مارس 2008

عـايـزة أكتــب وبـس


أحساس غريب اوى حسيته دلوقتى .. حسيت انى عايزة اكتب اى حاجه .. عايزة اكتب كلام من قلبى من غير ما أتقيد بحروف منسقه .. ولا بفكرة معينه .. عايزة اقول كلام مش عارفاه ولا مرتباه .. بس حاسه اوى ..
قولت ما أضعيش الفرصه وأدخل صفحتى .. هى الوحيده اللى ممكن أقول فيها أى كلام مش مشروط .. ولا عليه اى حدود ..
بس لما كتبت لقيت إن مفيش جوايا أى فكرة ترسمها حروفى .. لا هنقد حد ولا هاتكلم عن عيوب وميزات .. لا هحكى عن فرحه تمت .. ولا عن دمعه أتسجنت .. مفيش موضوع شاغلنى .. ولا فكرة محيارانى .. ولا عندى حزن هابكيه ..ولا فرحه هحلمها .. كل اللى جوايا انى عايزة أكتب من غير اى أسباب ..
زمان أول ما بدأت أحاول الكتابه .. كنت مقيده نفسى بشروط معينه على كتابتى .. زى مثلا إن لازم يكون جوايا فكرة مختلفه مش مكررة علشان أكتب عنها .. وكمان لازم أتكلم باللغه العربيه الفصحى .. ولازم طبعا أخذ بالى من النحو كويس ( وطبعا النحو ليه معايا منهج خاص تماما غير اللى الكل يعرفه ) ... وكل ده علشان الخاطرة اللى كتبتها تعجب اللى هيقراها .. ولازم ولازم ولازم .. ألف شرط وألف قيد وألف سجن سجنت فيه حروفى ..لدرجه أن الكتابة راحت عنى سنين طويله ونسيتها .. لغايت ما فكرنى بيها أقرب أنسان لقلبى ..
رجعت تانى أحاول أكتب .. وجوايا نفس الشروط والقيود والأحكام .. لغايت ما سمعت حروفى بتقولى حررينا .. أعتقينا لوجه الله .. خرجينا بأى شكل .. المهم نخرج ويكون لينا وجود .. حرام نتسجن جوه منظومه كتبتيها جواكى وبس .. نظمتى حروفها بدقه شديده ليكى ولعقلك الباطن بس .. خرجينا حررينا .. خلينا نسمع النقد فينا .. خلينا نعيش .. حرام نموت جوه سجن عقلك وبس .
فقولت أحاول تانى .. أحاول أكتب اللى احبه وبس .. مش اللى حابه حد يقراه .. خلينى اكون نفسى .. وأكتب اللى فى نفسى .. فرحه أو حتى آآآه .. المهم تتكلم حروفى .. قبل ما تموت جوه عقلى ..
ده بس اللى جيت أقوله .. لأ مش ده كمان .. اللى جيت أقوله كان أقل من كده بكثير .. لأنى لما بدأت الكتابة بدأت من غير فكرة لكلامى .. وفى عز كتابتى لقيت ألف فكرة بتتنطط فى خيالى .. أفتكرت كلمة كنت قريتها من فترة وما صدقتها وما جربتها غير دلوقتى .. كلمة مهمه أوى بتقول
" أبدأ بالكتابة حتى لو لم يكن لديك فكرة .. فقط أكتب وستأتيك الأفكار "

هناك 16 تعليقًا:

david santos يقول...

Excellent!
Thank you and have a good day.

أحمد منتصر يقول...

تماموز يا ضي :)

إنتي بقى من طنطا ولا جارتي ف التدوين وبس؟

تحياتي :)

Rania Lelah يقول...

اسعدتينى بكلماتك و حروفك دى يا ضى القمر
عرفت انى مش بس الى كدة
انا بردة بتبقى جوايا طاقة غريبة
حزينه او حيرة او حتى ضعف
ببقى عايزة اكتب و بس
اكتب اى حاجة و زى ما يطلع
و الغريبة ان الى بيطلع فكرة فعلا

ضــى القمــر يقول...

david santos

Thank you for your presence and your opinion

ضــى القمــر يقول...

أخى احمد ..

شكرا ليك اولا .. ثانيا أنا جارة ليكم فى التدوين وبس :)

أحترامى لحضورك ورأيك .

ضــى القمــر يقول...

رانيا ..

واضح أن الموضوع ده بيحصل للكل .. :)

لكن لأول مرة أجرب اكتب بدون فكرة وبلا هدف .. وبعدها بجد ارتحت جداا

مشكورة على تشريفك للمدونه يا رانيا .

د/اجدع بنوته يقول...

برافو عليكى ياضى

انك توصلتى للنتيجه دى

الواحد فعلا يعبر عن اى حاجه بتعصف جواه

تحياتى

المتمردة يقول...

احسن وقت للكتابة فعلا لما يكون عندنا كلام كتير ومينفعش نحكيه ..افضل اصدقاء ف الحالة دى الورقة والقلم

بيبقى عندنا حاجات جوانا مش قادرين نقولها .نحكيها .نعبر عنها . احيانا بنبكى واحيانا بنسرح واحيانا واحيانا

بس المهم اننا نكتبببب.تحياتى ليييكى

~ISLAM~ يقول...

انا عشت الحاله دى وبجد مفادتنيش
بالعكس حسيت انى خرفت ومبعرفش اكتب اصلا لأن الكتابه اصلها احساس
لما بتكتبى وانتى مقيده بقيود كتيره
الاحساس بيبقى مصطنع والاصطناع حتى لو عجب الناس عمره ما هيعجبك
بحييكى على فكره التوبيك
وبتمنالك التوفيق دايما
شكرا يا ضى

هاني النجار يقول...

يا ضي
الخاطرة اسمها خاطرة لأنها تخرج عفو الخاطر دون سابق ترتيب
هى ليست قصة أو قصيدة لابد لها من بناء درامي وتشويق وحبكة
ولكن
نجاح الخاطرة يكمن في صدقها وخروجها المباشر من القلب
لأن ما خرج من القلب حتماً يصل إلى القلب

لا يهم أن تكون فصحى أو عامية
المهم أن تكون صادقة
وكم كانت خاطرتكِ هذه صادقة

خالص تحياتي ومودتي

ضــى القمــر يقول...

أجدع بنوته ..

فعلا المهم ان الواحد يجرب وهيلاقى فى الىخر كلام بيطلع ..

شكرا على تعليقك يا بنوته :)

ضــى القمــر يقول...

المتمردة

كلامك فعلا صح .. ووقتها بتقدرى تخرجى كل اللى حاسه بدون قيود مش زى ما تكونى بتحكى لحد وبتحاولى تعملى كنترول على كلامك ..

شكرا ليك غاليتى على تواجدك هنا وتعليقك الرائع

تحياتى لكى .

ضــى القمــر يقول...

حكاوينا ..

أهلا بك يا اخى .. واشكرك على رأيك الكريم وتعليقك ..

وصدقت فيما قلت .. فالقيود تكون على الاحساس وقتها اكثر من الكلمات فقط .

شرفت المدونه

ضــى القمــر يقول...

المهاجر ..

صحيح يا اخى ما ذكرت .. ولكن أحيانا يكون الأحساس صادق ولكن أشتاق ان يخرج كم اتمنى كلمات مساوية للأحساس ..

أشكرك يا اخى على رأيك الكريم ..

تحياتى لك

غير معرف يقول...

$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$

غير معرف يقول...

$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$