الأربعاء، 13 أغسطس 2008

بتخـاف ( أو بتخـافى ) من ايـه ؟؟!!!



من فترة قريبه وانا دايما جوايا سؤال غريب بيروادنى دايما .. سؤال بتخيل اجابته من حال الكل .. أو بحاول اكتشفها من عيونهم أو من طبعاهم النفسيه اللى اعرف اغلبها احيانا .. لكن كثير بيقف سؤالى قدام حائط سد .. يعنى معرفش اجابته لا من طباعهم ولا حتى من احاسيسهم ..
وطبعا مش بعرض سؤالى عليهم .. لأنه ممكن يكون بسيط جداا ومش مستاهل كل اللى جوايا ده .. لكن فعلا معرفش ليه الاهميه اللى فرضتها جوه نفسى للسؤال ده ..!!

والسؤال ببساطه شديده عن الخوف ..

بتخاف ( او بتخافى ) من ايه ؟؟؟!!

مش قصدى هنا الخوف على المستقبل ولا الخوف على نفسنا من مصير مجهول مستقبلا ..

لكن قصدى الخوف الحقيقى من شىء فى حياتنا ..

كل واحد فينا جواه خوف من حاجه معينه ..

شوفت ناس عندهم خوف من المرتفعات ..

وناس عندهم خوف من الأماكن المغلقه ..

وناس بتخاف من سيرة شخص متوفى وبتخاف من كمان جداا من انها تقابل ناس تقرب له حتى لو بالصدفه ..

وناس بتخاف من الحسد والعين .. خوف بجد ورعب حقيقى .. لدرجه التصديق التام لو حصل ليهم حاجه بعد ما حد يشوفهم ..

وناس بتخاف من الخوف نفسه .. غريبه مش كده .. بس فعلا شوفت ناس خايفين من انهم يخافوا .. فطبعا دايما بيكونوا خايفين غصب عنهم ..
وناس بتخاف من الفيديوهات .. بيخافو انهم يفتحوا فيديو غريب .. لأنه الفيديو ممكن يكون فيه الشخص اللى بيجى يصرخ فجأة فى عز ما هما مشدودين للفيديو .. ولو ظهر فعلا بحيصلهم حالة من الانهيار الحقيقى من الخوف ..
يعنى لكل واحد فينا خوف من شىء معين ..
ويمكن لأنى بحب أغوص فى النفس البشريه شويه .. حبيت اعرف او اجمع كل نقاط الخوف اللى ممكن يخاف منها البشر ..

وانا ككل البشر بخاف من حاجات .. زى خوفى من الألم جدااا .. لدرجة أنى ممكن آآجل ميعاد الدكتور مية مرة لو كنت عارفه انه هسيبب لى الم ولو لثوانى .. لكن الغريب أنى لما بتعرضت للألم باتحمله بصمت وعادى .. لكن خوفى منه قبل ما يحصل بيكون خوف بجد كبيروحقيقى ..

وبخاف كمان من حاجه تانيه غريبه جداا .. بخاف من ملمس اى كائن حى .. (طبعا بخلاف البشر ..) حتى لو عصفورة أو كتكوت .. بخاف من نبضهم وحرارة جلدهم .. لو لمستهم وحسيت بكده بترعب بجد من بهزار ..
وطبعا معنى كده انى بخاف كمان من انهم يقربوا لى ..
(( بجد اللى انا فيه ده مأساااااه ))

ده معنى الخوف اللى اقصده فى حياة كل واحد منا .

يمكن تقولوا .. سؤال غريب .. ويمكن غير مهم عند الكثير منا ..

لكن فعلا السؤال ده شغلنى فترة معرفش ليه !!

فقولت أشاركم تفكيرى وسؤالى الغريب ..

بس ياريت تجاوبونى أنتوا كمان عن خوفكم ..!!

يعنى بتخافوا من ايه .... وليه ؟؟

يمكن بالى يرتاح وسؤالى يهدا فى بالى شويه ..

أو يمكن ارجع تانى ليكم بسؤال أغرب .. واجبركم تجاوبوا عليه ..

مين يعلم بشطحات عقلى !!!!.. هههههههه


هناك 13 تعليقًا:

sourah يقول...

اولا: بحب انهيكي على الفكرة الحلوة اوي دي لانني شايفة ان اول خطوة للتخلص من حالات الخوف هيه فتح باب الموضوع ده و طرح السؤال ده ؟

ثانيا : حلو اوي اسلوبك العامي ده ،و يا ريت تكتبي بيه كتير و تقدمي بيه مواضيع اكتر.

ثالثا : ما تتصوريش فرحتي بأنني اول شخص يعلق على البوست بتاعك ده، و على فكرة مشاركة مني في الموضوع بتاعك انا بخاف من البراغيت و الابراص (جمع برص) اول مابشوفها جسمي بيشيل و حالتي بتبقى كرب. يييييعععع ..

و يا رب تنهمر عليكي الافكار و تمتعينا بكتاباتك الجميلة ..

ضى القمر يقول...

صورتى الغاليه ..

فاجأتينى بردك الروعه ده .. ومن اسمك عرفت مين تكون صورة .. وبعد طول البحث عن الأسم وعن صاحبة الأسم ..أتأكد ظنى وطلتى اللى فى بالى :)
وبجد مفاجاة رووعه حبيبتى والله ..

أولا: نرد على ردك مفصلا .. بجد شكرا لرأيك حبيبتى وانا معاكى أن اول حل لعلاج الخوف فتح الباب ده.. لكن بعض المخاوف إذا فتح بابها أو إذا تم مواجهتها بيزيد الموضوع معاهم اكثر .. يعنى الموضوع بيتقلب عكسى بجد .. وشوفت ده بعينى .. الله يجعلنا جميعا من اصحاب المخاوف البسيطه العاديه .

ثانيا: بجد اسعدينى برأيك ده .. وخلاص هعمل بنصيحتك بجد :)

ثالثا: وماتتصوريش انتى فرحتى بيكى النهاردة وبمشاركتك هنا معايا . والله فرحتينى جداا .. بس على فكرة انا عرفت عنك النهاردة معلومه جديدة عن خوفك ماكنتش اعرفها .. شوفتى بقه دى فايده المدونات .. ههههههههه

واخيرا

الله لا يحرمنى منك ابدااا ..

ولا من تشريفك الجميل

الـمُـهاجر يقول...

حمد الله على السلامة يا ضي
نورتي مدونتكِ

طبعاً سؤالكِ مهم جداً
لأننا لما نعرف احنا بنخاف من ايه.. هانقدر نواجه مخاوفنا
انا مثلاً زمان كنت بأخاف من الجن والعفاريت والأماكن المهجورة المظلمة، لكني كنت بأجبر نفسي أمر في الأماكن دي.. لدرجة اني كنت باتعمد اروح المقابر في الليل لوحدي.. وواحدة واحدة بقت شيء عادي جدا،

راجل حكيم قال مرة: أكثر الناس جرأة على الأسد.. أكثرهم رؤية له
يعني ممكن تلاقي شاب أو بنت صغيرة بتتخانق في مظاهرة مع عقيد أو لواء أمن دولة، بينما راجل طول بعرض بيخاف من المخبر
الأول واجه خوفه واتغلب عليه، والتاني .. خاف من الخوف.

نسأل الله ألا نخاف غيره

زمرده يقول...

عزيزتى ضى

اولا انا مش عايزه التنبيط ده انتى ناقص تقولى ان اختى فلانه هى اللى بتخاف من الفيديوهات دى .كده تفضحينى على الملا.
لا بجد موضوع رائع وفكره تحفه جداااااااااااا
لانى مش عارفه اعمل ايه فى نفسى درجه خوفى من الفيديوهات والبلوتوث دول بقت مرعبه. يعنى حتى مقدرش اسمع صوتها من بعيد ومقدرش افتح اى بلوتوث انا مش متاكده انه مافيهوش حاجه .

بجد مش عارفه اعمل بينى وبينك فكرت اروح لدكتور نفسى بس حد يقعد بالعيال بقه :)

لو حد عنده حل للمشكله دى ياريت يبعتلى ينصحنى

شكرا جدا على الموضوع التحفه ده وابقى سيحيلى كمان اه ماتنسيش :)
تسلمى وتسلم افكارك

mostafa rayan يقول...

انا بردة بقلق من التعامل مع الحيوانات خصوصا القطط بكرهها كما يكره العرب اسرائيل يمكن يكون سبب نفسي كبر معانا مع السنين
لكن زي المهاجر ماقال احسن حل للخوف مواجهته
تحياتي لك يا جميلة

ضى القمر يقول...

اخى المهاجر

أشكرك اولا على ترحيبك يا اخى

واهلا بك هنااا ..

واشكرك على رأيك الكريم

ومشاركاتك بنوع خوفك القديم

وصدقت يا اخى بتفسيرك لقول الحكيم ..

فأول خطوة لمحاربة خوفنا .. اعتيادنا على مواجهته دائما ..

تحيتى لك وعلى تواجدك الراقى دوما

ضى القمر يقول...

أختى وزمردتى الغاليه .

على فكرة انا كنت لسه هحكى عن خوفك والهيستيريا اللى بتحصلك من الفيديوهات .. بس قولت بلاش علشان خاطرك انتِ بس .. يلا افتكرى الجمايل دى :)

وبخصوص الدكتور النفسى سيبى العيال وانتى مطمنه .. المهم انك ترتاحى .. بس الخوف على الدكتور النفسى مش أكثر .. هههههههه

عامة هدور ليكى على حل واقولك بينى وبينك .. بلاش على الملأ كده :)

اجمل تحيه شكر ليكى وعلى اجمل مرور يا قمرى :)

ضى القمر يقول...

أخى مصطفى ..

أهلا بتواجدك الرائع يا اخى .

واتمنى أنك تجد الامر أصبح طبيعى بعد مواجهتك لخوفك .. ولكن بالنسبه لى حاليا لا اقوى على مواجهة خوفى بأن اقترب من الحيوانات .. ولكن دعنا نحاول يا اخى ..

فالمحاولة حتى لو فشلت أفضل كثيرا من تجنبها تماما ..

تحيتى لك وعلى تواجدك يا اخى .

واصطنعتك لنفسي يقول...

أتذكر إني سألت أصدقائي يوماً هذا السؤال وكانت إجابتي إني أخاف من الفشل.. اخاف من الفشل في الاختيار بشكل أكثر تحديداً..
بوست جميل..
تقبلي مروري

إيمان

ضى القمر يقول...

أيمان ..

أهلا بتواجدكِ الأول فى مدونتى ..

بجد نورت الحروف بأسمك يا ايمان ..

واشكركِ على اضافتك برأيكِ الغالى غاليتى .


كما انكِ اوضحتى لى ان السؤال هاما عند الكثر وليس لى فقط .

واخيرا أتمنى لك النجاح والتوفيق بكل حياتك دائما .

الحكمة ضالة المؤمن يقول...

انا باعتبر نفسي راعي بيت
انا من المفاجات
و بصورة استغرب انا نفسي منها
ولا اقصد بالمفجات الزيارات او ما شابه

لا الحاجات الي تظهر فجاءة
فعلا تسبب لي نوع من الرعب
بس مع الوقت صرت حريص ان لا يكون لي هناك شيء يفزعني ونجحت
بس الغريب ان ابني 8شهور اشوف فيه الخوف من المفجات زيي
الظاهر ان احنا عيلة جبانه
للاسف
ولكي اكبر تحية

سارة نجاتى يقول...

هاى يا ضى , و الله واضح أن كلنا بنخاف من الكائنات التانية أكثر ما هى بتخاف مننا , يعنى أنا بخاف من الحشرات , صحيح مش فوبيا , بس لو عايزة تخضينى فى أى حته , قوليلى زى ما أخويا بيقول لى فجأة "صرصار" , تلاقينى نطيت من مكانى . لكن مخافش من الكلاب مع أنها أكبر فى الحجم و أشرس , أكيد فى مبرر لده .
أنا أول مرة أدخل مدونتك و عجبتنى بساطتها , أنا لسه عاملة مدونة من يومين , أول بوست فيها قصة فصيرة , أحب أعرف رأيكوا فيها.

غير معرف يقول...

福~
「朵
語‧,最一件事,就。好,你西...............................................................................................................................-...相互
來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘