السبت، 30 أغسطس 2008

هل هلالك يا رمضان


عدت الأيام ورجعتلنا من تانى يا شهر الصوم ..
بجد وحشتنا .. لكن اللى وحشنا اكثر أحساسنا بيك .. وفرحتنا بقدومك .. وتهليلنا بحضورك .. وانتظارنا بلهفه لرؤية هلالك ..
كنا بنتلم كلنا ونتفرج على التليفزيون واحنا منتظرين نعرف رمضان بكرة ولا بعده .. وبعدها تبدأ الأتصالات .. ويبدأ خروجنا بالفوانيس .. ونضحك ونفرح ونهلل ليك من قلبنا ..
نبص فى شوارعنا نلاقى الشباب متجمعين وفى صراع مع وقتهم الضيق .. رمضان هيهل ولازم تتعلق الزينات قبل حضوره .. وكأن رمضان كان بالنسبه لينا عريس .. وطبعا مينفعش عريسنا يدخل بيوتنا إلا لما نكون مجهزين اللى يليق له من تهليلات وترتيبات واكلات وعزومات ..
وفى اول رمضان .. ننتظر بلهفه رنات بياع العرقسوس .. وكأنه كان علم من اعلام رمضان .. رنته معروفه وليها بهجه مختلفه عن اى يوم عادى .. ويمكن كان أحساسنا احنا اللى بيجمل كل حاجه من حوالينا .. فرحتنا كانت بجد من قلبنا .. حتى الكبار كانوا بيفرحوا أوى وفرحه ظاهره مش مكتومه وبس فى قلبهم ..
مبنساش ابدا أنتظارى لآذان المغرب فى البلكونه .. كنت بحب اشوف الهدوء والسرعه فى نفس الوقت .. الشارع فاضى وهادى جدا لكن اللى فيه مستعجلين وبيجروا جرى قبل ما المغرب يأذن .. كنت طفله وقتها .. بس ده كان ليه عندى احساس مختلف .. وفرحة خاصه جدا جدا جدا .
كان شهر ليه معانى كثير جوانا .. عباده .. وفرحه .. وود .. ولمه .. وسهر .. ولهفه .. وحب .
طيب ايه اللى حصل .. راحت فين فرحتنا وبهجتنا دى .. ما رمضان هو رمضان .. متغيرش فيه اى شىء .. فضله هو هو .. وقدره هو هو .. يبقى ليه فرحتنا بيه قلت كده ؟؟ ..
كل سنه بتروح البهجه من جوانا اكثر واكثر .. او يمكن كل واحد بقه بيعيشها جواه وبس .. لدرجه أن ليلة الرؤية النهاردة لكن ولا حد حاسس بيها ..
يااااه يا رمضان .. بجد خسارة أحساسنا بيك يروووح
بالنسبه لينا أحنا كبرنا وفرحنا بيه زى ما اتمنينا .. لكن اطفالنا هيحسوا بيه إمتى .. إزاى هنديهم فرحة رمضان إذا كانت من الأصل مش جوانا .. أزاى هنطلب منهم يستنوه من سنه لسنه .. وهما حاسين بأنه شهر عادى زى اى شهر تانى ..
ياريت نبدأ من نفسنا .. ونفرح أطفالنا بنفسنا .. لأن فرحتهم بيه دلوقتى .. هتكون اجمل ذكرياتهم لما يكبروا .. زى ما ذكريتنا لشهرنا الفضيل .. أغلى ذكريات عشناها فى عمرنا ..
وأخيرا .. بتمنى من قلبى إن السنه دى تكون أخر سنه تتوه عنا فرحتنا بهلال رمضان ..
وخير الختام .. خير الدعاء فى شهرنا الفضيل ..
اَللّهُمَّ قَرِّبْني فيهِ اِلى مَرضاتِكَ ، وَجَنِّبْني فيهِ مِن سَخَطِكَ وَنَقِماتِكَ ، وَ وَفِّقني فيهِ لِقِرائَةِ اياتِِكَ ، بِرَحمَتِكَ يا أرحَمَ الرّاحمينَ .
اَللّهُمَّ ارْزُقني فيهِ الذِّهنَ وَالتَّنْبيهِ ، وَباعِدْني فيهِ مِنَ السَّفاهَةِ وَالتَّمْويهِ ، وَ اجْعَل لي نَصيباً مِن كُلِّ خَيْرٍ تُنْزِلُ فيهِ ، بِجودِكَ يا اَجوَدَ الأجْوَدينَ .
اَللّهُمَّ قَوِّني فيهِ عَلى اِقامَةِ اَمرِكَ ، وَ اَذِقني فيهِ حَلاوَةِ ذِكْرِكَ ، وَ اَوْزِعْني فيهِ لِأداءِ شُكْرِكَ بِكَرَمِكَ ، وَاحْفَظْني فيهِ بِحِفظِكَ و َسَتْرِكَ يا اَبصَرَ النّاظِرينَ .
اَللّهُمَّ اجعَلني فيهِ مِنَ المُستَغْفِرينَ ، وَ اجعَلني فيهِ مِن عِبادِكَ الصّالحينَ القانِتينَ ، وَ اجعَلني فيهِ مِن اَوْليائِكَ المُقَرَّبينَ ، بِرَأفَتِكَ يا اَرحَمَ الرّاحمينَ .
أمين .أمين يارب العالمين
اللهم تقبل منا ومنكم صالح الاعمال
كل عام وانتم بكل خير
كل عام وانتم بكل صحه وعافيه
كل عام ونحن إلى الله أقرب

هناك 25 تعليقًا:

Sourah يقول...

ههههههههههه
بحجز اول تعليق ..

وحوي يا وحوي ...
كل سنة و انت طيبة يا ضي ، و ربنا يتقبل منك و من المسلمين اجمعين صالح العمل في شهر الخير بحوله انه الكريم ..

بس على فكرة يا ضي ، رمضان زي ماهو ، واحنا كمان زي ما احنا ، الدنيا هيه اللي اتغيرت علينا ، الهموم اللي الواحد بيشوفها في الدنيا هيه اللي صبغت قلوبنا بالحزن ، و لا لو علينا، احنا بأقل حاجة بنفرح ، و بأبسط ضحكة قلبنا بيرتاح ..

كل سنة و انت طيبة يا حبيبتي مرة تانية ، و عاوزة اقوللك حاجة ، احمدي ربنا انك بتقضي رمضان في مصر ، و على الاقل بتشوفي و بتشربي العرق سوس ، هنا بأه في الرياض الوضع مختلف خالص ، العرقسوس بيتباع بودرة و بتعمليه في البيت ، حاجه كده ماليهاش طعم مش زي بتاع مصر . كل حاجه ماليهاش طعم من غير حبيايبنا اللي في مصر ..

كل سنة و مصر طيبة وكل المصريين بخير ..

موناليزا يقول...

كل سنة وانتى طيبة ويارب يكون رمضان سعيد علينا جميعا
وتقبل الله منا ومنكم صالح الاعمال

Ahmed Al-Sabbagh يقول...

كل سنة وانتى والأسرة الكريمة طيبين وبخير

ورمضان كريم

بعودة الايام

اللهم بلغنا رمضان وانت راضٍ عنا

تقديرى ومحبتى

أحمد

ضى القمر يقول...

صورتى الغاليه

وليك مقعدكِ الأول الخاص بيكِ :)ههههههه

كل سنه وانتى طيبه حبيبتى

صورة الدنيا فعلا لهتنا .. وانا مش بقول عننا احنا .. لكن الجيل الجديد هينسى كل الذكريات دى ليه معيشهاش .. وإزاى هيعيشها إذا كنا أحنا مش بنوصلها ليه ..؟؟

والحمد لله انى فى مصر وانى فى انتظاركِ حبيبتى :)

لكن فرحة مصر مش زى الاول خااااااااالص .. كل الناس بتجرى بعقول ملهيه وبس ..
الله يعين الجميع .
كل سنه وانتى طيبه يا اجمل صورة :)

ضى القمر يقول...

مونى

أزيك يا قمرة :)

كل سنه وانتى طيبه حبيبتى ..

اللهم تقبل منا ومنكم صالح الاعمال

شكرا لحضوركِ الرائع دائما :)

ضى القمر يقول...

اخى احمد

كل عام وانت بخير :)

رمضان مبارك إن شاء الله علينا وعليكم .

اللهم بلغنا رمضان وانت راضٍ عنا

أمين امين يارب العالمين

أشكرك على زيارتك الغاليه يا اخى :)

تحيتى لك

الوان الحياة يقول...

السلام عليكم ورحمة الله وبركاته
كل عام وحضرتك بالف خير
مدونتك ماشاء الله رائعه
ورمضان كريم

حازم سويلم يقول...

ولا يسعنى الا ان أقول لك رمضان كريم

Khaled يقول...

كل عام وانتم بخير
ورمضان كريم
تقبلى تحياتى

ضى القمر يقول...

الوان الحياه .

تشرفت بزياتك الغاليه يا اختى

كل عام وانتى بخير

واشكرك على رأيك الغالى بالمدونه :)

فلقد زاد جمالها بزيارتكِ

تحيتى لكِ اختى :)

رمضان مبارك

ضى القمر يقول...

اخى حازم

ولا يسعنى إلا ان اقول شرفتنى بزيارتك الكريمه يا اخى

كل وانت بخير :)

ضى القمر يقول...

اخى خالد

كل عام وانت بخير

رمضان مبارك علينا وعليكم يا اخى :)

تحيتى لك

Nabil يقول...

كل سنه وحضرتك طيبه
طبعا محقه في موضوع البهجه اللى مبقتش زى زمان
ان شاء الله ترجع لينا هويتنا قريب تحياتى علي روعة الموضوع
رمضان كريم

appy يقول...

كل سنه وانى طيبه ولكل منا ذكرياته فى رمضان بجد الحلوة اوى بس يا ريت نستفيد منها اوى

كوارث يقول...

كل عام وانتي بخير
اصلح الله حال ولاة أمور المسلمين !
والله انا خايف ليبقى رمضان بعد كده في السنة الميلادية ومن ذوات ال31 يوم !
وهما قادرين يعملوها فعلاً ..يعني لو قالوا ان رمضان بعد اغسطس .. حد هيقدر يقول لا ؟
حلو قوي الدعاء اللي في الآخر ده ..
ربنا يتقبل

نهر الحب يقول...

أسأل الله الذي لن تطيب الدنيا إلا بذكره
ولن تطيب الآخرة إلا بعفوه
ولن تطيب الجنة إلا برؤيته
أن يديم ثباتك ويقوي إيمانك وصحتك
ويرفع قدرك ويشرح صدرك
ويسهل خطاك لدروب الجنة
وأن يجعلك من عتقائه من النار
ومبروك عليك شهر رمضان

نهر الحب يقول...

أسأل الله الذي لن تطيب الدنيا إلا بذكره
ولن تطيب الآخرة إلا بعفوه
ولن تطيب الجنة إلا برؤيته
أن يديم ثباتك ويقوي إيمانك وصحتك
ويرفع قدرك ويشرح صدرك
ويسهل خطاك لدروب الجنة
وأن يجعلك من عتقائه من النار
ومبروك عليك شهر رمضان

Dr.Mohammed Gohary يقول...

السلام عليكم
ازيك يا ضي القمر

إيه هيا كانت مرة كدا يتيمة وخلااااااص

بعدها حلفتي تلتوميت يمين ما هتزورينا تااااااني

دا حتي غير ضي القمر اللي انتي شوفتيها عندي واتفاجئتي بيها في كمان واحده تالته ضي القمر واسمها الحركي كيارااااا ابقي عدي شوفيهاااااا ههههههههههههههه
يلاااا بقينا مجمع ضي القمر


بالنسبة للبوست أكثر من رائع

فعلا عندك حق
ما عادش في بهجة زمان برمضان
بس هو ايه في حياتنا لسه فرحته زي زمااان
بصي الفرحة هي الفرحة بس احنا كل ما بنكبر بنشيل الهم أكتر فبنحس ان الفرحة قلت
مبيحسش الفرحة الا اللي باله مرتاح ورايق زي الاطفال وزي ما كنا زيهم زمان
لكن فعلا عندك حق
ما ينفعش نكتم فرحتهم

كل سنة وانتي طيبة

ومستنيكي

ومتنسيناااااااااش تاني

تؤ تؤ
مش هقبل أي أعذار
نوهاااااااااااااااااااائي

romansy يقول...

كل سنة وانتى طيبة
ورمضان كريم
وان شاء الله
تحققى اللى نفسك فية

ضى القمر يقول...

أخى نبيل

أشكرك على زيارتك الاولى والجميله للمدونه

وادعو معك ان تعود الفرحه لنا سريعا

أجمل تحيه لتواجدك يا اخى

ضى القمر يقول...

كوراث

لأ ماتخفاش .. الحكومه مش عايزة تستفزنا أكثر من كده ..
يعنى هيخلوه تبع الرؤيه الفلكيه دايما :)

شكرا لك تعليقك الجميل ..

وادعو الله ان يتقبل منا ومنكم الدعاء

تحيتى لك

ضى القمر يقول...

نهر الحب

لم اجد رداأروع من ان ادعو لكِ بنفس دعائك ..

أسأل الله الذي لن تطيب الدنيا إلا بذكره
ولن تطيب الآخرة إلا بعفوه
ولن تطيب الجنة إلا برؤيته
أن يديم ثباتكِ ويقوي إيمانكِ وصحتكِ
ويرفع قدركِ ويشرح صدركِ
ويسهل خطاكِ لدروب الجنة
وأن يجعلكِ من عتقائه من النار

اللهم تقبل منا ومنكِ يا اختى صالح الأعمال

محبتى لكِ :)

ضى القمر يقول...

Dr.Mohammed Gohary

ههههههه

والله ابداااا .. واكيد هدخل مدونتك كثييير .. لكن المشكله فى ضيق الوقت من رمضان بس .. هو اللى اخذنى من عالم التدوين ككل والله .

انا بعتذر ليك بجد .
هى بس الأيام دى تعدى .. وهتلاقى ردودى قبل حتى ما تنزل البوست .. ايه رأيك كده كويس :)

هههههههههه

وبالمناسبه انا دخلت فعلا مدونه كيارااا واكتشفت ان اسم المدونه ضى القمر .. بس فعلا مدونه جميله جداا .

ربنا يزيد ويبارك فى الأسم :) ههههه

شوف انت معاك حق .. فى ان اللى شايل الهم مش بيحس بالفرحه دى ..
لكن الأطفال كمان ميعرفوش الفرحه دى ..
بجد مش عارفين ايه هى مظاهر الفرح برمضان .. أكبر فرحه ليهم هى الصواريخ وبس .. وكفايه كده جدااا ..هههههه

د/ محمد ..أكيد مفيش أعذار إن شاء الله ..
وهتلاقى ردودى دايما عندك إن شاء الله ..أنتظرنى :)

ضى القمر يقول...

رومانسى

كل عام وانت بخير يا اخى

رمضان مبارك علينا جميعا إن شاء الله ..

يارب احقق اللى نفسى فيه :)

شكرا لك زيارتك الرائعه يا اخى ..

تحيتى لك

غير معرف يقول...

福~
「朵
語‧,最一件事,就。好,你西...............................................................................................................................-...相互
來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘