السبت، 6 سبتمبر 2008

كارثة الدويقه .. حسبنا الله ونعم الوكيل


مش عارفه ابدأ كلامى بأيه .. لأن الوجع اكبر من اى كلام ومن اى وصف ..
كتل صخريه بتتهد على راس ساكنيها ..
أطفال بتسجنها الحجارة تحت الأرض .. بيوت أربع ادوار بتتسواى بالأرض .. أهالى بتصرخ من تحت الأنقاض بتستنجد بحد لكن مين اللى هيوصل ليها .. ناس بتشوف اللى باقى من جثث اهليها قدام عينيها ..
ياااا مشاهد مرعبه .. مشاهد مخيفه بكل المقاييس ..
قلبونا تعبت من اللى شوفناه واحنا بعيد .. يبقى اللى فيها عاميلن ايه ؟؟ الله يصبر ويقوى كل اللى عاش الكارثه دى .
والغريب أن بعض السكان عارفين ان الدور بقه عليهم .. ومع ذلك مش عارفين يمشوا ولا يروحوا فين ؟؟ قالوا خلاص نستنى القضاء .. اهو هيكون احن علينا من حاكمينا ..
بعد المأساه دى ياترى هنحاكم مين .؟
نحاكم الجبل لأنه ما راعاش أهله اللى عاشوا فيه سنين ؟؟
ولا نحاكم اللى كانوا عارفين أن الصخور هتقع من خمس سنين ؟؟
نعذر الجبل لأن عمره أنتهى فى لحظه فوقع غصب عنه ونسى الى هيموتوا معاه ؟؟
ولا نعذر حكومتنا لأنهم حاولوا ( كثير ) من سكان المنظقه العشوائيه ( المساكين ) أنهم يخلوا مساكنهم لكنهم رافضوا ..
وطبعا السكان دول رفضوا يخلوا مساكنهم لأنهم مش ممكن يعوضوها طبعا لأن فيها مايه وكهربا وصرف صحى .. فليه يمشوا ويسبوا ده كله .. ليه يمشوا ويسبوا بيوتهم أو (جنتهم) العشوائيه .
ناس عاشوا خمس سنين فى خطر .. ومحدش عرف يلاقى ليهم مساكن تانيه .. طيب إزاى ؟؟
ناس عارفين ان هضبه هتتهد على اهله من خمس سنين .. معملوش حاجه ليه ..؟؟
أه نسيت .. أكيد ماكنش معاهم فلوس تكفي أنهم يبنوا ليهم شقق بسيطه ( أو حتى عشوائيه ) .
فى الحاله دى لازم طبعا نعذرهم .. وندعى من قلبنا ربنا يفرجها عليهم .. علشان يقدروا ينقذوا الباقيين الأحياء .
بجد حراااااااااااااام .. اللى بيحصل ده حرااااااااام .
ليه ارواحنا بترخص كده .. ليه كل شىء غالى إلا حياتنا .
ولأمتى هنخرج من كارثه لكارثه .. يمكن دى طريقه جديده لتقليل اعدادنا .. هى فكرة أكيده المفعول خاصة مع تنظيم الأسرة .. بعد كذا سنه هنلاقى عددنا وصل 50 مليون ..
حرااااااام بجد .. مين اللى هيتحاسب ؟؟ ولا الموضوع هيعدى قضاء وقدر زى العباره ؟؟
ولا ايه اللى هيحصل بالظبط ...
كبيرها محافظ القاهرة هيتشال وخلاص .. لكن المساكن هتفضل زى ما هى .. وطبعا نقلهم لمساكن تانيه هيتأجل من يوم ليوم .
كان الوعد النهاردة الصبح أنهم هيفطروا فى بيوت هتوفرها الدوله ليهم .. لكن لغايت دلوقتى محدش منهم سكن ولو حتى خيمه .. بالرغم من ان مشروع مساكنهم خلص .. لكن اتسكن ( للمحاسيب ) .
ودلوقتى هتبدأ قصه التبرعات من تانى .. تبرعوا لبناء مساكن لهم .. تبرعوا حتى ننقذهم .. تبرعوا حتى نأويهم .. تبرعوا تبرعوا .
والحمد لله وصلت تبرعات كثيير من اهل الخير بالملايين .. لكن يارب يارب يارب توصل لأهلها .. يارب حد يعملهم حاجه .. يارب .
وفى أخر كلامى .. بعتذر إذا كنت مكتبتش أخبار صحفيه عن الحادثه أو الكارثه .. لكن اللى هيدور على النت هيلاقى الاخبار كثير .
اللى جوايا أكبر من اى حقائق تتقرى .. جوايا أنفعال وضغط نفسى وانا بشوف صور الضحايا .. لأ ( أشلاء ) الضحايا الباقيه ..
بالرغم من اننا المفروض نكون اتعودنا عليها .. لكن غصب عننا لسه بننفعل وبنغضب .. لسه مماتش جوانا الأحساس والرحمه ..
لسه بنقدر نحزن ونتوجع لأهلنا .. لكن يارب حكومتنا تتوجع زينا ..
حسبنا الله ونعم الوكيل
حسبنا الله ونعم الوكيل
حسبنا الله ونعم الوكيل

هناك 34 تعليقًا:

Sourah يقول...

حسبنا الله و نعم الوكيل ..

و اللهم تقبل موتاهم من الشهداء و نعمهم يا رب في جنات النعيم .. آمين .....

appy يقول...

الناس بقالها 3 سنين بتقولهم على مياه الصرف الصحى اللى هتبوظ الجبل وهما مفيش فايده سكنوا 60اسره بس من كل المنطقه ويقولوا اصل الشقق مش جهزت

شملولي بن سحلولي يقول...

ربنا يرحمنا برحمته الواسعة

د/اجدع بنوته يقول...

كلنا جوانا نااااااااااار

اااااااااااااااااااااه

ضى القمر يقول...

صورة

ادعى معكِ يا اختى

اللهم امين امين يارب العالمين

ضى القمر يقول...

أيى

هما عرافين ان الجبل أيل للسقوط من خمس سنين .. وقالوا للناس اخرجوا لكن مردوووش ..
بذمتك يا ابى ده كلام يتعقل ..
والله مهاذل .. واستهتار مالوش مثيل بأرواح الناس
الله يصبر اهل الموتى ويقويهم ..
وينتقم من اللى كان السبب

ضى القمر يقول...

شملولى

الله يرحم موتانا ويتولاهم برحمته ..
والله يقوينا ويصبرنا على تقبل المزيد من الصدمات .

ضى القمر يقول...

د/ أجدع بنوته.

والنااار اللى جوانا مش هتحرق حد غيرنا يا بنوته .
لأننا للأسف عرفنا إزاى نكتم نارنا ونخليها جوانا و لينا وبس .

romansy يقول...

طب ف ايدينا اية نعملة
غير اننا ندعوا لهم بالرحمة والهداية

لو حسبنا هنحاسب مين
نحاسب الغلبانين الشقيانين
ولا نحاسب الناس المرفهين
اللى عايشين مرتاحين
منقولش غير كلمة واحدة
حسبى الله ونعم الوكيل

أبو خالد يقول...

أبنتي الفاضلة / ضي القمر
الذي يجلب الحزن أن الجميع كان يعلم و من سنوات أن هذا سيحدث و لكن لا حياة لمن تنادي لم يسقط الجبل صخورة في غمضة عين و أنتباهتها و لكن علي مدار سنين
فماذا فعل المسئول ماذا سيقول للخالق سبحانه و تعالي عند الحساب..
ربي سلم سلم
حسبنا الله و نعم الوكيل

طارق الغنام يقول...

ضى القمر
لا حول ولا قوة الا بالله
حسبنا الله ونعم الوكيل
انا كتبت بوست يمكن يكون فيه رائيى مع ان مافى القلب اكبر
ادعوكى لقرائته
واحييكى على البوست الرائع الذى احسست بكل كلمه فيه
تقبلى تحياتى
ودمتى بحفظ الله

ضى القمر يقول...

اخى رومانسى

فى ايدنا كثيير نعمله.. لكن لو الكل حب يعمل حاجه من جواه فعلا .
وبرضه مش فى ايدنا الدعاء وبس ..
(لا يغير الله ما بقوما حتى يغيروا ما بأنفسهم )صدق الله العظيم .
ومش مهم نحاسب مين دلوقتى
المهم تجيلناالجراءه للحساب وبس .
حسبنا الله ونعم الوكيل
شكرا لك تواجدك الراقى دوما يا اخى
تحيتى لك

ضى القمر يقول...

اخى الكريم أبو خالد .

أولا : أهلا بك فى زيارتك الأولى والغاليه للمدونه يا اخى ..
بكل صدق سعدت بها كثييرا والله .

ثانيا :معك حق يا اخى ..
ماذا سيقولون جميعا للخالق سبحانه وتعالى يوم الحساب العظيم .

اللهم عافينا وأحفظنا ممن لا يخشاك .
اللهم اهدنا واهدهم جميعا .
أمين يارب العالمين .

شكرا لك تعليقك الراقى يا اخى
تحيتى لك

ضى القمر يقول...

اخى طارق

قرأت موضوعك وهو رائع بكل معنى الكلمه يا اخى ..
أختصرت فيه سلسله كبيرة من مأسينا ..
لكن يا ترى من يتعظ .؟
أشكرك على رأيك الغالى فى البوست .
وتشرفت بزيارتك وتعليقك الغالى يا اخى .
الله لا يحرمنا من تواجدك الدائم
تحيتى وتقديرى لك

Dr.Mohammed Gohary يقول...

حسبنا الله ونعم الوكيل

بجد حاجة تجنن

فعلااااا حياة الانسان أرخص حاجة في مصر

تحياتي

بجد موضوع هايل

وربنا يلطف بالناس

دكتور/ ايمن القناوى يقول...

شكرا ليك ياضى القمر على تغطيتك للحدث المؤلم ده والله مش عارفين هنعمل ايه بس .. كل يوم كارثه لدرجه لو حد فينا قرر يتابع الاحداث اوعده انه هينزل كل يوم بوست فيه مصيبه .. والبقيه تانى

تحياتى ليك اختى الفاضله ضى القمر ..ادام الله ضيائك

اللهم اجعلنا ممن غفرت لهم فى هذا اليوم

أميمة كامل يقول...

يارب يصبرهم على مصابهم و يلطف بنا يوم الوقوف بين يديه وسؤاله لنا هل كنا مقصرين فى حق اخوان لنا ماتوا ظلما و قهرا
ربنا يرحمنا و يغفر لنا
ولا حول و لا قوة الا بالله

ضى القمر يقول...

د/ محمد

فعلا الحاجه اللى بترخص دايما هى حياتنا للأسف .

وأشكرك يا اخى على رأيك الغالى فى البوست

تحيتى لتواجدك الراقى برقى فكرك دائما يا اخى

ضى القمر يقول...

دكتور/ ايمن القناوى

علشان كده الأفضل ما نتابعش الأحداث دايما ..
أشكرك يا دكتور على زيارتك الأولى والرائعه للمدونه
واتمنى الا تكون الاخيرة يا اخى .

جميل دعائك الأخير يا اخى .. ولا املك إلا ان ادعى به معك . أمين يارب العالمين

تحيتى لك يا اخى

ضى القمر يقول...

اختى اميمه

جميل تعليقكِ هنا يا اختى .
ولا املك ألا ان ادعو به .
عسى ان تهدأ قلبونا بكثرة الدعاء
تحيتى لكِ
واشكركِ على جمال زيارتك .
محبتى لكِ

7akwena يقول...

على فكره بقى ده العادى بتاع البلد
يأما حوادث اتوبيسات وعربيات يأما حريق مجلس الشعب يأما عباره تغرق يأما قطر يولع يأما شباب تغرق وهى هربانه من قرف البلد يأما محلات لحم حمير يأما عمارات تقع وتتهد باللى فيها
يأما اى حاجه
مادام هما قاعدين بيشربوا شاى بالياسمين مش مهم بقى اى حاجه تانيه
وادينا بنقل والزحمه بتخف شويه
هنقول ايه ولا ايه
احنا محتاجين معجزه عشان البلد دى ينصلح حالها
لأن كده مفيش امل
ولا تزعلى نفسك ادعيلهم ربنا يهديهم
او يخدهم لان دول هما اللى يستحقوا الموت فعلا
تحياتى ليكى

FreeKiller يقول...

هنقول ايه بس
حسبنا الله و نعم الوكيل

الكارثة حصلت
مع انهم كانوا عارفين قبلها

و هما دلوقت عارفين انها هتكرر
بس لما تلاقيك عارف ان المصيبة جاية و ميتعملش ليها حساب

يبقى انت اكيد
اكيد ف مصر

شكرا لزيارتك مدونتي

على فكرة أنا بنت مش ولد

تحياتي

ضى القمر يقول...

حكاوينا ..
واضح ان الشاى اللى بالياسمين ده بيعمل أنتعاش رهييب وفقدان مؤقت للذاكره :)

خلاص نجربه .. يمكن يخلينا كويسين ..

حكاوينا .. تعليقك بصراحه رووعه .. أختصرت فيه بلاوى كثير بمك تاهت للحظات من ذاكرتنا .

ومعاك حق ... فعلا محتاجين معجزة ..:)

وبخصوص الدعاء فأحنا والله بندعى دايما .
الله يهدى الجميع .

شكرا لك يا اخى على تواجدك الجميل :)

ضى القمر يقول...

فرى كيلر ..

أهلا بيكِ با بنوته .. :)

وزى ما قولتلك فى مدونتك .. أسفه انى غلطت فى اسمك وتوقعت انك ولد .. بس كويس أنك جداااا انك بنوته يا قمر :)

وبصراحه عجبنى تعليقك أوى ..

وخاصة يبقى انت أكيد فى مصر ..

والله معاكِ حق ..هههههه

شكرا لكِ يا قمرى على تواجدك الجميل

ام البنات يقول...

ضى القمر
الحاجه الوحيدة تقريبا اللى لسه مقتولهاش فينا
إحساسنا بالغير
زوجى بيقولى عملوا حساب فى بنك ناصر
قلت له مش هادفع مليم للعالم ده هابعتها لاهلنا فى الدويقه
ادفع فى بنك
ويطالبوهم باثبات هات ما يثبت ان لك ميت..ولا مصاب
وفى الآخر
مصر بتتحرك فوقينا
مش بينا
انا لله وإنا اليه راجعون

انا ودماغي يقول...

حسبنا الله و نعم الوكيل......هى دى بلدنا و الحمد لله

ربنا يجعلهم من أهل الفردوس و يصبرهم الاهالى على ما بلاهم

ضى القمر يقول...

أم البنات ..
والله الواحد بقه محتار يتبرع لمين ؟
كوارثنا مش هتنتهى أبدا .. وصندوق التبرعات مش هيقفل أبدا ابدااا ..
لكن الأفضل اننا نعمل اللى فى ايدينا .. مادمنا قادرين على التبرع يبقى نتبرع . وربنا عالم بالنوايا . أما إذا كانت التبرعات دى هتوصل ليهم بجد ولا لأ .. فده شىء فى ذمة القائمين على الموضوع ده . وهما وضميرهم ( وطبعا مش هظلمهم حد وانا مش واثقهفى كلامى .. لكن اتمنى ان التبرعات دى توصل لكل مستحقيها فعلا )

شكرا اختى الغاليه .. على تواجدك الرائع ..
محبتى لكِ

ضى القمر يقول...

انا ودماغى

أهلا بيكِ وبتعليقكِ فى المدونه يا حبيبتى .
وأدعو الله معكَِ أن يجعلهم من أهل الفردوس و يصبر الاهالى على ما بلاهم .
أمين أمين يارب العالمين

محبتى لكِ يا اختى

Ahmed Al-Sabbagh يقول...

حسبى الله ونعم الوكيل

ABOALI يقول...

يادويقة
دوقنا فيكى قسوة الانسان
انسان نسى يوم
هايقابل فيه الرحمن
يسئله عملت ايه فى اخوك الانسان
وهما صايمين نادى المنادى
الوقت حان
يمكن تكونوا انتوا الضحايا
بس ده جرس الى بنى انسان
قوم و فكر
اشحن عقلك
شوفت بعنيك
اعتبر يا انسان
يا حكومة
بصوا لفوق
مافيش ارحم من الرحمن
هو اللى خلق وسوى كمان
عنده مافيش منظرة
ولا اعلان
كلامه بين الكاف والنون
يا ترى فهمتوا العنوان
ياااااااااااااارب
بعدد من سبحك فى السموات
والارض
ارحم من مات فى رمضان
تقبلهم كن لهم هناك
يااااااااااااااااارب
طامعين فيك
فلا تخيب فيك رجائنا
ماتوا وهم صومى
فى شهر فرضته علينا
غايته التقوى
فاااجعلهم من تزين بها
واعفو عن من حاول
وضعفت نفسه
فهو انسان
تعلم حاجته اليك
ضمهم لك
وضمنا معهم
فنحن مثلهم
موتى

ضى القمر يقول...

أحمد الصباغ

أشكر تواجدك الراقى دوما

تحيتى لك

ضى القمر يقول...

ABOALI

كلماتك هناا فى منتهى الرووعه

أصابت فيما وصفت وفيما اعلت

اللهم تقبل دعائك ودعائنا يا اخى

أشكرك كثيرا على زيارتك الغاليه للمدونه .
واشكرك على اروع وابلغ تعليق
تحيتى لك يا اخى

غير معرف يقول...

福~
「朵
語‧,最一件事,就。好,你西...............................................................................................................................-...相互
來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘

بنوتة مصرية يقول...

حسبى ربى ونعم الوكيل
والله معنديش كلام يتقال غير انى زعلانة على الناس البسيطة اللى مالهاش ذنب بالفسادة دة اللى عامم فى البلد بسسب الحكومة والنظام الفاسد هما بس ذنبهم اية يخسرو اروحهم وارواح اطفالهم عشان شوية فاسدون حسبى ربى ونعم الوكيل لهم الله
سوف يحاسبهم الله ان الله حسابة عسير